Bericht Skiweekend 2016

Usgschlafe am Punkt 8i hemer eus am Samstigmorge vor de Milchhütte troffe. Alli (ussert öpper) voll bepackt und mit super Luune simmer id Berge vo Wildhuus gstartet. Schnee top - Wetter flop - Stimmig supermegatoll! Zur Stärkig am Mittag nach vielem ue und abe hets di Beschte Älplermakkeroni geh :) Am Namittag hets eus ufem Sessellift fascht devogwindet, mit einige Hilfeschrei simmer denn doch no heil acho... und uf de Schreck abadbar ;) Die überus netti Bedienig het eus Zwieble mit Flammchueche bracht...dezue hemer Janif gspielt unds eifach lustig gha :) S'ahschlüssende Fondue (womer trotz em Flammchueche hend möge- die einte hends fascht ned glaubt...), s'gmüetliche zemesi, s'Bädele im "Hotpot", Schneeengel in Badhose und de Barfuessspaziergang ums Huus hend de Skitag perfekt gmacht.

Am nechste Morge hemer eus uf viel Schnee igstellt, nachem Blick usem Fenster isch denn d'Ernüechterig cho... Es het di halb Nacht gschiffet und gstürmt --> vom schöne Schnee isch nüme viel ume gsi... Nachem Zmorge simmer denn trotz em Pflotsch (di einte am Punkt 9i) uf de Pischte gstande. Schnee flop - Wetter top - Stimmig immerno supermegatoll :) Nachdem eusi eigne Bretter nüme gfätzt sind hends di einte mitem Serviertablett probiert - erfolglos. Drum hemer nacher d'Idee abadbar super gfunde! Det hemer no euse Nachbarsverein Freiestei troffe. Bimene Pingpong gegenand hemer eusi Ass (Kampfrolle im Schnee) us de Ärmel gschüttlet und hochuus gwunne :) Mer hend de Tag mit Wasserski und Wakeboard fahre, Sünnele und Schneeballschlachte verbracht. Danke de Organisatore Päde, Michi und Hendrik! :)