Getu Lagerbericht Samstag

Hüt isch de letzschti Tag vo eusem Lager gsi. Mit luter Musig simer am Morge gweckt worde und sind den alli no chli müed go Zmorge esse. Dütlich wacher und gstärkt sind mer dänn i d Halle gange und händ namal alles gäh. Es sind mega cooli fortschritt wo mer gseht im gegesatz zum erste Tag. I de Pause hend s mir Grosse eus guet gah lah und hend eus vo de Chlinere massiere lah (Alles guet sie händs freiwillig gmacht mir händ sie nöd zwunge) De Muskelkater hät eus allne zuegsetzt und es hät viel gsichter gäh wo zimlich müed usgseh händ. Trotz allem hämmer de morge hinter eus bracht und sind go Zmittag esse (Es hät undefinierbari Härdöpfel Stängeli, Bratwurst und Bluemechohl gäh) und s Highlight sind d Luxemburgerli gsi wo s zum Dessert geh hät. Nach dem chli lustige Esse simmer dänn namal es letzts Mal i Halle gange und händ mit letzter Chraft alles gäh. Am Reck isch gwippt worde, a de Ring isch gchugglet und gschwunge worde, am Sprung dräiht und am Bode sind na es paar schöni Flicks und Saltos zoge worde. Dänn isch es au scho a s ufruume gange. Nachdem mer d Halle picobello zruggglah hend sind alli na go dusche und jetzt ässed mer na Zvieri. Alles i allem isch es es mega cools Lager gsi und mer händ Ziit richtig chönne gnüsse. Trotz dere Ziit freued sich jetzt alli wieder uf s heigah und zum de Muskelkater uskuriere.

Selina, Céline, Maurin, Alya, Larissa, Ben, Sarah, Melina und Lian