Getu Lagerbericht Freitag

Sali mini liebe Fründe vo Diheime
Gester Abig hemmer ja noh es lässigs Abigprogramm gha. Nachenere riese Calzone hemmer s’beliebtischte vo allne Spieli gspielt: Schoggi uspacke mit Messer und Gable! Gruppe Fluppis het’s wie immer am beste chönne, aber das git denn ja natürlich wiedermal kei Pünkt. ☹ Bim Quiz hemmer denn leider recht verseit, obwohl mir bis jetzt findet, dass eusi Antworte meh wie richtig gsi sind. Wer gunne het wüssemer nöd; isch Nebesach.
Jetzt hemmer zum Glück au de dritti Trainingstag überlebt!
Alles het ahgfange demit, dass d’Anja am Morge zerst mal de Tee wieder usgspuckt het und eh wunderschöni Fontäne entstande isch. Di meiste würed das en glungene Start in Tag nenne. Nach emne wahnsinnig tolle z’Moorge mit vielne heisse Schoggis, simmer i d’Halle gschprinted, de Nilo natürlich allne vorus. Di erste paar Trainingssessions sind bi de Alte nanig so gschmeidig gloffe, jede Muskel het weh da und de Schlafmangel het mer sehr gspürt. Chunnt halt devo, wenn di Junge scho am halbi 7ni am Morge dur s’ganze Huus renned und ah jedi Türe chlopfed. Am Mittag simmer denn all wieder zemme gsesse bi Hörnli mit Ghacktets (s’het eh bitzli e lustigi Farb gha, aber mer wennd eus ja nöd beschwere.) D’Gioia het das Problem schnell glöst indem sie eifach de ganzi Chübel Chäs drüber gleert het, so het mers au nümme gseh, geschweige denn gschmöckt. Am Namittag ischs denn wiitergange mit sensationellem Flick-Training vo de Carla und Pilates vo de Anja. Obwohl d’Mona sowie euse Trainer de Benji kei einzigi Üebig anebracht hend und de Nilo s’nödmal probiert het, hemmer denn au scho gli alles hinter eus gha und wieder chönne go dusche. Nachdem mer eus mit Wärmegel igschmiert hend und all Blatere verarztet worde sind, hemmer eus uf de Weg zum z’Nacht gmacht; hoffentlich öpis guets - und freued eus ufs Abigprogramm wommer hoffentlich endlich mal günned
Di beste Grüesslis und en grosse Kuss us Graubünde, eues Gwünnerteam: d’Fluppis!

Zoe, Nilo, Gioia, Fiona, Xenia, Eanna, Alina, Marvin, Finja, Ronja