Turnfahrt 2023

Turnfahrt het wie immer am Samstig morge gstartet, am viertel vor 10ni, also gaaanz human,  am Flughafe bim brezelkönig.

Gstartet simmer richtig züri, wo mer zersch es bitz dur d stadt gwaglet sind. Bi de "Bar A Dox" hemmer gstoppet, wo mer denn eh obe use bar schuelig becho hend. Alli sind am shake gsi - es paar eh chli fester als anderi (Gell Selä de Pear Basil Smash het scho bitz Bizi gforderet). Eigentlich ischs ja eh halbi Degustation gsi wenn mer ehrlich sind. Nach 20 Test-Sprützene simmer alli recht guet druf gsi und hend de eint oder ander neu favorit. Als Abschluss hemmer sogar es Rezeptbuech und en 4cl-Ingwer-Likör-Probiererli becho. Danke tuusig Alex!

Nach dem heitere Morge hemmer na d Carina ufgablet, z Mittag gspiese und restlichi Bsorgige für die zweistündig Zugfahrt richtig Graubünde organisiert. 

Im Zug isch au ned chille agseit gsii, d Competitions hend agfange. Euses neu gwunnene Bar-Keeper wüsse isch diirekt uf d Prob gstellt worde. Welle Cocktail beinhaltet nomal Tequila, Triple Sec und Limmetesaft? Neiii s isch ned de Tequila Sunrise! Usme Selbst-Gmixte Tabasco, Ingwer Shot (was au immer), hemmer alli zuetate müesse usefinde - sozege unmöglich. Die eint oder andere hend da scho recht s gsicht verzoge. Danke liebe Male und Kevin für gar nüt...

In Davos acho simmer zersch trötselnd de hügel zu de Jugendherberge ufegloffe. Dete acho hemmer direkt eusi zimmer bezoge, dringendi Pippipause igleit und scho bald de z Nacht verschlunge. Nachem z Nacht hets na wiiteri Spieli geh. Mitem Bar-Memory und em Pub-Quiz hemmer de Abig beendet. Drum schriebt de super bricht grad Gruppe Vollgas (d sieger vo de herze) wo leider ned so guet abgschnitte het. :(

De Abig usklinge lah hemmer ih de Ex-Bar im Dorf. 

Am nöchste Morge hemmer scho früeh wieder los müesse uf s nöchste abentüür. Nachme schnelle z Morge simmer mitem Bus zumne nöchste Bus, wo mer anstatt no meh staple, es paar hend müesse uf die nöchsti rundi warte. Bitzeli spöter als geplant, simmer denn in Monstein für die kulinarischi Wanderig acho. Es isch direkt recht steil duruf, aber s het sich glohnt, will d obe het eus es meeega feins Plättli und chalti Getränk erwartet. Die motivierte wo na hend möge, hend d Rundwanderig mitme Wegbierli fertig gmacht, während die andere de Namittag mitem Bier ufem Liegestuehl gnosse hend.

Troffe hend die beide gruppe sich wieder dete, wo mer gstartet hend. Mitme feine Capuns oder Spätzlipfanne isch au de Tag scho wieder ume gsii.

Jetzt simmer scho wieder ufem Heiweg. Während die einte na voller Energie sind, sind die andere na de verloreni Schlaf vo gester am nahole.

Danke Kevin und Male für die cooli Turnfahrt, s het gfäget!

Joni, Nico, Jessi, Julie und Angie
(& nomal: d Sieger vo de Herze;) )