Mittwoch: Der Morgen Danach

Usschalfe isch i dem lager keis thema. 4 stund schlaf langet ja;) mami und papi vom trainingslager, salome und sven, hend eus mit ihrem schönste lächle am zmorgetisch empfange.nachdem alli pullis wieder am richtige ort und dankendi umarmige vergeh worde sind (danke male für die herzlichi umarmig) het de thierry es bsundrig rutschigs glas verwütscht und s wiise tischtuech grad mit orangesaft igfärbt. und dasmal isch nöd de blitzchrieg vo de franzose am buffet tschuld sondern die morgendlichi fehlendi fiinmotorik;) de eint oder ander spezialischt*in het am morge chum us de auge gseh und het drum nur die eint oder ander banane to-go gno. de meh oder wenig usgebigi zmorge het eus natürlich gstärkt und so simmer voll motiviert i de zug richtig barcelona igstige. trotz muskelkater i de bei hemmer um jede einzelni sitzplatz im überfüllte zug kämpft, und trotz biige und staple hemmers nöd gschaft, dass alli hend chöne sitze. weg de müedigkeit, em suurstoffmangel und de drängelnde lüüt hemmer all 5 minute uf d uhr gluegt. in barcelona acho hend sich nach gusto grüppli bildet und hend ihre eigene weg igschlage. plan numero un: tapas und ab ad bar, für die kulinarischi wiiterbildig plan numero dos: sightseeing, agfange bi de sagrada familia plan numero tres: shopping für die fashion-bewusste unter eusnach es paar erholsame stündli hemmer eus alli zeme wiedergfunde und hend sich gegesiitig vo ihrne erlebnis verzellt. dank em super informationsfluss vo eusem organisationsteam und, mer chans fast nöd glaube, eusere obeuse pünklichkeit hends alli rechtziitig zum treffpunkt gschafft. so simmer mit angst und bang wege de mangelde sitzplätz im zug richtig bahnhof gange. am bahnhof simmer denn schnuerstracks zu eusem gleis gstiflet, wo mir no 10 minute gwartet hend. aber bevor euse zug acho isch hend no zwei anderi a eusem gleis ghalte und jedes mal simmer fast i e falschi richtig gfahre.wo euse zug cho isch, hemmer eus scho uf e wiiteri heissi zugfahrt igstellt. zu eusem glück hets  aber richtig hei nöd ganz so vil lüt gha und so hend meh vo eus chöne en sitzplatz ergattere. und will de zug nöd ganz voll gsi isch, sind die restliche, wo kein sitzplatz becho hend, an bode gsesse. mir im zug, lustig hämers gha, aber luut simer scho nöd gsiii, spieli spilend am bode ghocked, chunt wiä e fuuriä e iheimischi azgumpe und wiist eus druf hi das wämer ufstaht meh platz macht für anderi. nur leider häts kein unterschied gmacht, will eineweg nöd meh lüüt igstige sind. sozial wiämer sind hämer das eus natürli z herze gno und sind ufgstande miteme suure stei im gsicht.im hotel acho, sind di einte an strand go kubb spiele und bädele im sehr chalte wasser, die restliche sind go d bei hochlagere zum d muskle entspanne vom viele stah im zug. de tag hämer miteme lustige abigprogramm, womer eusi beste talent under bewiist gstellt händ abgschlosse. vo tanzilag zu selbersgschribene raps, robbe ufem steibode, arschbombe in pool, häts alles debi gha... eusi kompetenti schüri hät mit guetem feedback zu allne vorfüehrige d siiger erkore. sehr erschöpft, aber z friedene gsichter simer denn go d augelieder entspanne und go chüssi lose.

team sputzle aka tschiripinggelizäihe