Getu Lagerbericht Donnerstag

Hoi zemme

Gestert Abig hemmer eh super cooli Fotichallenge organisiert vode Marisa (danke!) derfe mache. Die einte hend sich mit Mehl chli volle gmacht (sött Magnesium darstelle), während anderi Adilette als Reckleder brucht hend. Ziel devo isch gsi es Foti mache mit öpisem wome zum turne brucht. Nachdem sind die Chline scho go pfuuse, während die Ältere na eh chli agressiveri Rundi töggele oder Jenga gspielt hend.

Hüt Morge simmer vom Benji am 7ni mit Musik gwekt. Die chline Meitli sind vorbildlich de Benji am 5 vor 7ni go wecke, dass er ja au nöd verschlaft.

Nach em super Zmorge simmer alli id Halle go ufwärme. Die Einte hend den mit em Rondat-Training vode Selä ahgfange, die Andere händ scho d Händ offe vode Ring. Wo alli es super Rondat hend chöne (sogar d K2er wüssed jetzt was es isch ;) simmer go Zmittag esse. Die erschte hend Härdöpfelstock mit eme «Vulkan» becho. Nacher hetts den leider nume na Ries mit eme «Tümpel» vo Sauce geh.

Mit ere sehr churze Pause und eme Powernapp vo de Grössere vo nöd emal 5 min. sind die Chline scho wieder dur Gäng grännt.

Zrugg ide Halle hemmer wieder igwärmt und eusi neue Teili wietergüebt. Es sind alli scho chli müed gsi, aber de super Zvieri het eus den na die letscht Energie geh für die letschte zwei Grät. D Anja het hüt au mit paarne eh Pilates-Stund gmacht. Mir hend alli gmerkt, wie ahstrengend das chan sie.

Jetzt simmer de super Bricht für eu am schribe und freue eus scho richtig uf s Znachtesse.

Liebi Grüessli vo eune Adilettos 😊