Getu Lagerbericht Mittwoch

Hüt morge händ mir eus am 10:15 Uhr in Lufinge Dorf troffe. Det hemmer euses Gepäck in es Büsli glade, demit mer s nöd sälber ueschleicke händ müsse. Mit es paar Leiter hemmer eus dänn mit em Bus und Zug uf de Wäg gmacht. Vo Züri bis Landquart simmer ussert zwei Chinese allei im Wage gsi und händ das sehr guet usgnützt. Mir händs eus bequem gmacht, halt au uf em Bode und händ mit ere Musigbox de Zug unterhalte, indem mer sehr luut und sehr verstörendi Musig glost händ. In Landquart händ mir dänn eusi Musig lisliger gmacht, demit mir umstiege chönd i diä Rhätischi Bahn. Au dete hämer Musig glost, aber nüme ganz e soo luut und nüme so schlimmi. In Schiers acho, hämer eus uf de Wäg zu de Turnhalle gmacht. Vor de Turnhalle hämer dänn no euse Zmittag gässe oder zumindest diä wo in nonig in Züri gässe händ. Will mer nonig id Halle händ chöne, hämmer dänn vor de Halle no es Spieli gspielt, wo für die Chline sehr cool gsi isch. I de Halle hämmer dänn müsse alles ufstelle :( Nach em ufstelle hämmer eus no guet iigwärmt, so dass mer nöd scho am erste Tag en Unfall bauet. Nachher hämmer agfange mit em erste und zweite Grät, wo alli iteilt worde sind. D K5er händ für nach em zweite Grät de Zvieri vorbereitet. Nachher hämmer nomal eis Grät turnt. Am 5ii isch fertig gsi für hüt und alli sind go dusche. Zäme simer nachher zum Hüsli gloffe und s Gepäck isch verteilt worde, wo es riese Chaos gsi isch. Nach ere Aasag vom Benji, was erlaubt isch und was nöd, hämer euses Zimmer bezoge und d Better verteilt. Am 18:15 Uhr häts dänn ändlich Znacht ghä :)